ភ្នំពេញ៖ ក្រសួងសុខាភិបាល អំពាវនាវដល់ពលរដ្ឋដែលបានជាសះស្បើយពីជំងឺកូវីដ-១៩ ចាប់ពី ៤ខែឡើង អាចទៅទទួលការចាក់វ៉ាក់សាំងការពារជំងឺកូវីដ-១៩ នៅតាមទីតាំងដែលអាជ្ញាធរបានកំណត់។
ក្រសួងសុខាភិបាល បានអញ្ជើញពលរដ្ឋជាសះស្បើយពីជំងឺកូវីដ-១៩ ដែលមិនទាន់ចាក់វ៉ាក់សាំងការពារជំងឺកូវីដ-១៩ ដែលមានអាយុពី ៦ឆ្នាំឡើងឱ្យទៅចាក់វ៉ាក់សាំងការពារជំងឺកូវីដ-១៩ ដោយស្ម័គ្រចិត្តនៅតាមមន្ទីរពេទ្យបង្អែករាជធានី-ខេត្ត និងនៅតាមបណ្ដាទីតាំងចាក់វ៉ាក់សាំងកូវីដ-១៩ មួយចំនួនទៀតដែលរដ្ឋបាលរាជធានី-ខេត្ត កំពុងបើកដំណើរការចាក់ជូនពលរដ្ឋ។
គិតត្រឹមថ្ងៃទី២២ ខែកញ្ញានេះ កម្ពុជារកឃើញអ្នកឆ្លងជំងឺកូវីដ-១៩ ជាង១០ម៉ឺននាក់ អ្នកជាសះស្បើយជាង ៩ម៉ឺន ៨ពាន់នាក់ ខណៈអ្នកចំនួនអ្នកចាក់វ៉ាក់សាំងការពារជំងឺកូវីដ-១៩ មានចំនួនជាង ១២លាន ៥សែននាក់ ស្មើនឹងជាង ៧២ភាគរយ បើធៀបនឹងពលរដ្ឋសរុប ១៦លាននាក់៕
